உளவளத்துணையாளர்கள் மற்றும் உளவளத்துணை ஆசிரியர்களுக்கான தேசிய மட்டத்திலான விழிப்புணர்வு நிகழ்ச்சித் தொடர்: புத்தளம் மாவட்டம்

தற்போதைய அரசாங்கத்தின் “முழு நாடுமே ஒன்றாக” போதைப்பொருள் ஒழிப்பு தேசிய செயற்திட்டத்திற்கு நேரடிப் பங்களிப்பினை வழங்கிவரும் புனர்வாழ்வுப் பணியகத்தின் புனர்வாழ்வுச் செயற்பாடு மற்றும் போதைப்பொருள் ஒழிப்பு தேசிய நடவடிக்கைகளுக்கு அரச மற்றும் அரச சார்பற்ற நிறுவனங்களின் நேரடித் தலையீடுகளைப் பெற்றுக்கொள்வதற்கும், அவற்றை ஒரே வலையமைப்பின் கீழ் ஒருங்கிணைப்பதற்குமான தேசிய அவசியத்தின் அடிப்படையில், உளவளத்துணையாளர்கள் மற்றும் உளவளத்துணை ஆசிரியர்களுக்கு விழிப்புணர்வூட்டும் தேசிய வேலைத்திட்டத் தொடரின் புத்தளம் மாவட்ட வேலைத்திட்டம் 2026.10.14 அன்று புத்தளம் மாவட்ட செயலகத்தில் நடைபெற்றது.

புத்தளம் மாவட்ட செயலாளர் வை.ஐ.எம். சில்வா அவர்களின் தலைமையில் நடைபெற்ற இந்நிகழ்வில், பிரதேச செயலாளர்கள், புனர்வாழ்வு ஆணையாளர் நாயகம் பிரிகேடியர் எம்.எஸ். அமித், பொலிஸ் போதைப்பொருள் ஒழிப்பு பணியகத்தின் பிரதிப் பொலிஸ் மா அதிபர் அசோக்க தர்மசேன, சிரேஷ்ட உளவளத்துணையாளரும் “முழு நாடுமே ஒன்றாக” நச்சுப் போதைப்பொருள் தடுப்பு தேசிய வேலைத்திட்டத்தின் உறுப்பினருமான எம்.எம்.ஜி.எம்.பி. ரஷாத், புத்தளம் தள மருத்துவமனையின் மனநல மருத்துவர் ஜனனி போவின்ன, மேலதிக புனர்வாழ்வு ஆணையாளர் நாயகம் பிரிகேடியர் பிரசன்ன பிரியலால், வலயக் கல்விப் பணிப்பாளர்கள், தேசிய அபாயகர ஔடதங்கள் கட்டுப்பாட்டு சபையின் இனுஷா ஹெட்டியாராச்சி, சிலாபம் பொலிஸ் அத்தியட்சகர் 1 பிரபாத் தயானந்த, புத்தளம் சிறைச்சாலையின் பொறுப்பதிகாரி ஏ.பி.ஆர். பள்ளவல, தலைமையக பொலிஸ் பரிசோதகர்/நிலையப் பொறுப்பதிகாரி பீ.எம்.எச்.பி. விஜேகோன் உள்ளிட்ட பல முக்கிய விருந்தினர்களும் உளவளத்துணையாளர்கள் மற்றும் ஆசிரியர்களும் கலந்துகொண்டனர்.

புனர்வாழ்வு ஆணையாளர் நாயகம் வருகை தந்தவர்களை வரவேற்று உரையாற்றுகையில்; போதைப்பொருளுக்கு அடிமையான இளைஞர்களை அதிலிருந்து மீட்பதே புனர்வாழ்வு பணியகத்தின் நோக்கம் என்றும், அதற்கு இவ்வேலைத்திட்டத்தின் பங்களிப்பு மற்றும் முக்கியத்துவம் குறித்தும், முன்னாய்வு மற்றும் பின்னாய்வுச் செயல்முறைக்காக உளவளத்துணையாளர்களின் மாவட்டப் பயிற்சிக் குழாமை அமைப்பதன் முக்கியத்துவம் குறித்தும் வலியுறுத்தினார்.

போதைப்பொருள் அற்ற நாட்டைக் கட்டியெழுப்புவதற்காக ஆரம்பிக்கப்பட்டுள்ள “முழு நாடுமே ஒன்றாக” தேசிய செயல்முறையின் கீழ், புத்தளம் மாவட்டத்திலுள்ள இளைஞர் சமுதாயத்தைப் போதைப்பொருளிலிருந்து பாதுகாப்பதன் அவசியம், கல்வியின் ஊடாக நல்ல பிள்ளைகளை உருவாக்குவதில் உளவளத்துணை ஆசிரியர்களுக்கு உள்ள பொறுப்பு மற்றும் புனர்வாழ்வு பணியகத்தினால் முன்னெடுக்கப்படும் தேசிய பணியின் முக்கியத்துவம் குறித்து மாவட்ட செயலாளர் மேலும் வலியுறுத்தினார்.

வேலைத்திட்டத்தின் முதலாவது அழைக்கப்பட்ட விரிவுரையாளராகக் கலந்துகொண்ட சிரேஷ்ட உளவளத்துணையாளரும் “முழு நாடுமே ஒன்றாக” நச்சுப் போதைப்பொருள் தடுப்பு தேசிய வேலைத்திட்டத்தின் உறுப்பினருமான எம்.எம்.ஜி.எம்.பி. ரஷாத்; போதைப்பொருள் பயன்பாட்டினால் ஏற்படும் உடலியல் மற்றும் உளவியல் பாதிப்புகள், பல்வேறு போதைப்பொருள் வகைப்பாடுகளுக்கு ஏற்ப மனதளவில் ஏற்படும் இரசாயன மாற்றங்கள், உளவளத்துணையின் பல்வேறு கோணங்கள், உளவளத்துணையாளர்களின் சமூகப் பொறுப்பு, இளம்பருவத்தினர் போதைப்பொருளை நோக்கி ஈர்க்கப்படுவதற்கான காரணங்கள், குடும்பத்தின் ஒத்துழைப்பு மற்றும் சமூக அவமானம் போன்ற விடயங்கள் குறித்து கலந்துரையாடல் வடிவிலான விரிவுரையையொன்றை நிகழ்த்தினார்.

பொலிஸ் போதைப்பொருள் ஒழிப்பு பணியகத்தின் பிரதிப் பொலிஸ் மா அதிபர் அசோக்க தர்மசேன; போதைப்பொருள் வகைப்பாடு, இளைஞர்கள் போதைப்பொருள் பயன்பாட்டினால் அடையும் பேரழிவு நிலைமைகள், போதைப்பொருள் பரவல், போதைப்பொருள் பயன்பாட்டின் ஆபத்தான பக்கங்கள், அதன் சமூகப் பாதிப்புகள் மற்றும் போதைப்பொருள் தொடர்பான சட்ட ரீதியான நிலைமைகள் குறித்து காலத்திற்குப் பொருத்தமான மற்றும் ஆழமான சொற்பொழிவொன்றை ஆற்றினார்.

விரிவுரைகளின் முடிவில் புனர்வாழ்வு ஆணையாளர் நாயகம் பிரிகேடியர் எம்.எஸ். அமித், பிரதிப் பொலிஸ் மா அதிபர் அசோக்க தர்மசேன, எம்.எம்.ஜி.எம்.பி. ரஷாத், ஏ.பி.ஆர். பள்ளவல மற்றும் இனுஷா ஹெட்டியாராச்சி ஆகியோரின் தலைமையில், கலந்துகொண்ட உளவளத்துணையாளர்களுடன் தற்போதைய போதைப்பொருள் நிலைமை, அடிமையாதல், சூழல் மற்றும் தனிப்பட்ட காரணிகள், பாடசாலை அமைப்பின் பொறுப்பு மற்றும் புனர்வாழ்வு ஆகியவை குறித்து சிறப்பான துறைசார் நிபுணர் கலந்துரையாடலொன்றும் இடம்பெற்றது.